ဝက်သားနီချက်

ဝက်သားနီချက်လေးဟာ စိတ်ရှည်ရှည်နဲ့ စောင့်ကြည့်ပြီးမချက်ရင် ဝက်သားနီချက် မဖြစ်ပဲ မိနစ်ပိုင်းအတွင်း ဝက်သားမဲချက်ဖြစ်သွားတတ်တဲ့ ဟင်းလေးပါ။ သကြား၊ ဆီတို့ဖြင့် ကြော်ပြီး အပြင်သား တင်းလာမှ အတွင်းသား အိအောင် ရေနွေးထည့်ပြီး တည်ရပါတယ်။ ပြီးမှ အနှစ် အနည်းငယ်ရအောင် ကြက်သွန်နီ၊ ကြက်သွန်ဖြူ ထည့်ကြော်ပေးပါတယ်။ ( ကြက်သွန်နီ၊ ကြက်သွန်ဖြူ ထည့်ပြီးမှ ရေထည့်ကာ အသားနူးအောင် တည်လျှင် ဝက်အချိုချက်၊ ဝက်ဆီပြန်တို့၏ အရသာကဲ့သို့ ဖြစ်သွားတတ်ပါသည်။)

 ပါဝင်ပစ္စည်းများ

• ဝက်သုံးထပ်သား                    – ၁ ကီလို ခန့်
• ဆား                                       – လက်ဖက်ရည်ဇွန်း ၂ ဇွန်း
• ကြက်သားမှုန့်                         – လက်ဖက်ရည်ဇွန်း ၃ ဇွန်း
• ဆီ                                          – 210 ml
• သကြား                                  – ထမင်းစားဇွန်း ၃ ဇွန်း
• အရောင်တင်မှုန့်                      – လက်ဖက်ရည်ဇွန်း ၂ ဇွန်း
• ရေနွေး                                    – 1 1/2 cup (375 ml)
• ဓါးပြားရိုက်ထားသော ကြက်သွန်ဖြူ အတက်ကြီး                        – ၇ တက်
• ၈ စိတ်ကွဲလှီးထားသော ဂေါက်သီးအရွယ် ကြက်သွန်နီ                 – ၄ လုံး

1. ရေဆေးပြီး တတ်နိူင်သမျှ ရေခြောက်အောင်လုပ်ထားသော ဝက်သားကို ဆား၊ chicken powder တို့ဖြင့် နယ်ပြီး ၁၅ မိနစ်ခန့် နပ်ထားပါ။
2. ဆီ နှင့် သကြားကို မကပ်နိူင်သော အိုးထဲထည့်ကာ medium high heat ဖြင့် အပူပေးထားပါ။ (သကြားများ အကျက်ညီစေရန် အိုးထဲဖြန့်ပြီးထည့်ပေးထားပါ။)
3. သကြားများ အနီရောင် အတော်လေးပြောင်းလာသည်နှင့် medium heat သို့လျှော့ပါ။
4. ပြီးလျှင် ချက်ချင်း အသားများထည့်ချကာ သကြားမတူးအောင် ခပ်သွက်သွက် ၃၊၄ ချက်မွှေကြော်ပေးပြီး အသားများအားလုံး တတ်နိူင်သမျှ အိုးအောက်ခြေဖြင့် ထိနေအောင် ဖြန့်ပေးထားပါ။
5. အားလုံးဖြန့်ပြီးလျှင် အသားများ နီလာစေရန် မမွှေပဲ ၃ မိနစ်ခန့်ထားပါ။
6. ၃ မိနစ်ခန့်ထားပြီးလျှင် အသားများနီလာပြီဖြစ်၍ နောက်တစ်ဖက်လှန်ပေးပါ။
7. အသားနောက်တစ်ဖက်ကိုလည်း နီလာအောင် ၃ မိနစ်ခန့် ထပ်ထားပေးပါ၊
8. ပြီးလျှင် အရောင်တင်မှုန့်ထည့်၍ ၃၊ ၄ ချက်မွှေကာ အသားထဲမှ အရည်များခမ်းပြီး ဆီပြန်လာသည်အထိ တည်ထားပါ။ (သကြားနှင့် အရောင်တင်မှုန့်က တူးလွယ်၍ မျက်ခြေမပြတ် ကြည့်ပေး၊ မွှေပေးဖို့လိုပါတယ်။)
9. အဆီအသားများ အပြင်သားတင်းပြီး၊ ဆီပြန်လာလျှင် ရေနွေးထည့်ကာ အိုးအဖုံး ဖုံး၍ medium heat ဖြင့် မိနှစ် ၂၀ ခန့် ( ရေခမ်းပြီး ဆီပြန်လာအောင်) တည်ထားပါ။ အရည်ခမ်းခါနီးလျှင် မတူး၊ မမဲသွားအောင် မကြာခဏမွှေပေးဖို့လိုပါတယ်။
10. ကြက်သွန်ဖြူ နှင့် ကြက်သွန်နီထည့်ကာ အိုးအဖုံးဖွင့်ပြီး ၁၅ မိနစ်ခန့် ( ကြက်သွန်များ အတော်လေးခြောက်သွားအောင်) medium high heat ဖြင့် မွှေကြော်ပေးပြီးလျှင် ဝက်သားနီချက်လေး အရသာရှိစွာ သုံးဆောင်ရန် အသင့်ဖြစ်ပါပြီ။